അർജന്റീന ഫുട്ബോൾ അസോസിയേഷനെതിരെ ഗുരുതര ആരോപണങ്ങൾ; സാമ്പത്തിക തട്ടിപ്പും ലൈംഗികാതിക്രമങ്ങളും പുറത്തുവിട്ട് അന്വേഷണ റിപ്പോർട്ട്

ബ്യൂണസ് ഐറിസ്: അർജന്റീന ഫുട്ബോൾ അസോസിയേഷനെ (എഎഫ്എ) ലക്ഷ്യമിട്ട് ഫ്രഞ്ച് അന്വേഷണാത്മക മാധ്യമപ്രവർത്തകൻ റൊമെയ്ൻ മൊളിന പുറത്തുവിട്ട റിപ്പോർട്ട് അന്താരാഷ്ട്ര ഫുട്ബോൾ ലോകത്ത് വലിയ ചർച്ചയ്ക്ക് വഴിവെച്ചിരിക്കുകയാണ്. പ്രായപൂർത്തിയാകാത്തവർക്കെതിരായ ലൈംഗികാതിക്രമ കേസുകൾ ഒതുക്കിത്തീർത്തതുൾപ്പെടെയുള്ള ഗുരുതരമായ ആരോപണങ്ങളാണ് റിപ്പോർട്ടിലുള്ളത്. കോടിക്കണക്കിന് ഡോളറിന്റെ കള്ളപ്പണം വെളുപ്പിക്കൽ, സാമ്പത്തിക തട്ടിപ്പ്, വ്യാജരേഖ നിർമ്മാണം എന്നിവയ്ക്ക് പുറമെ, വർഷങ്ങളായി ഫിഫ എഎഫ്എ നേതൃത്വത്തെ സംരക്ഷിക്കുന്നുവെന്ന ആരോപണവും മൊളിന ഉന്നയിക്കുന്നു.

24 മിനിറ്റ് ദൈർഘ്യമുള്ള അന്വേഷണ വീഡിയോയിലൂടെയാണ് മൊളിന ഞെട്ടിക്കുന്ന വിവരങ്ങൾ പുറത്തുവിട്ടത്. ‘അർജന്റീന ഫുട്ബോളിലെ മാഫിയ’ എന്ന് വിശേഷിപ്പിച്ചിരിക്കുന്ന ഈ റിപ്പോർട്ടിൽ സാമ്പത്തിക ക്രമക്കേടുകൾ തെളിയിക്കുന്ന രേഖകളും ഉൾപ്പെടുത്തിയിട്ടുണ്ടെന്നാണ് അദ്ദേഹത്തിന്റെ അവകാശവാദം. 300 മില്യൺ ഡോളറിലധികം തുകയുടെ ദുരുപയോഗം സംബന്ധിച്ച് എഫ്ബിഐ അന്വേഷണം നടക്കുന്നുണ്ടെന്നും, 2026 ലോകകപ്പിന് പിന്നാലെ TrodProdEnter എന്ന കമ്പനി വഴി വൻതുകകൾ വിവിധ ഷെൽ കമ്പനികളിലേക്ക് മാറ്റിയെന്നും റിപ്പോർട്ടിൽ പറയുന്നു. 42 മില്യൺ ഡോളറിലധികം തുക വ്യാജ കമ്പനികളിലേക്ക് മാറ്റിയതായും, ഈ പണം ഉപയോഗിച്ച് എഎഫ്എ പ്രസിഡന്റ് ക്ലോഡിയോ ടാപിയ, ട്രഷറർ പാബ്ലോ ടോവിഗിനോ എന്നിവർ ആഡംബര വസ്തുക്കളും സ്വകാര്യ ജെറ്റുകളും സ്വന്തമാക്കിയെന്നും റിപ്പോർട്ടിൽ ആരോപിക്കുന്നു. ഇറ്റാലിയൻ ക്ലബ്ബായ പെറൂജിയയെ ഇടനില കമ്പനികൾ വഴി സ്വന്തമാക്കിയതായും സൂചനയുണ്ട്.

പ്രായപൂർത്തിയാകാത്തവർക്കെതിരായ ലൈംഗികാതിക്രമം ആരോപിക്കപ്പെട്ട പരിശീലകൻ ഡീഗോ ഗുവാച്ചിയെ എഎഫ്എയും ഫിഫയും ചേർന്ന് സംരക്ഷിച്ചുവെന്നതാണ് റിപ്പോർട്ടിലെ ഏറ്റവും ഗുരുതരമായ ആരോപണം. വിവരങ്ങൾ പുറത്തുകൊണ്ടുവരാൻ ശ്രമിച്ചവരെയും മാധ്യമങ്ങളെയും ബ്ലാക്ക്‌മെയിൽ ചെയ്തതായും മൊളിന ആരോപിക്കുന്നു. ഫിഫയുടെ ചീഫ് ലീഗൽ ഓഫീസർ എമിലിയോ ഗാർസിയ അർജന്റീന ഫുട്ബോൾ അസോസിയേഷന് സ്ഥാപനപരമായ സംരക്ഷണം നൽകിയെന്നും ഇതുവഴി നടപടികൾ ഒഴിവാക്കപ്പെട്ടെന്നും റിപ്പോർട്ടിൽ പറയുന്നു. അർജന്റീന പ്രസിഡന്റ് ഹാവിയർ മിലെയും എഎഫ്എ നേതൃത്വവും തമ്മിൽ ഫുട്ബോൾ ക്ലബ്ബുകളുടെ സ്വകാര്യവൽക്കരണത്തെച്ചൊല്ലി തർക്കം നിലനിൽക്കുന്ന സാഹചര്യത്തിലാണ് ഈ വെളിപ്പെടുത്തൽ. എന്നിരുന്നാലും, റിപ്പോർട്ടിലുള്ള ആരോപണങ്ങളെക്കുറിച്ച് എഎഫ്എയോ ഫിഫയോ ഔദ്യോഗികമായി പ്രതികരിച്ചിട്ടില്ല. അന്വേഷണ ഏജൻസികളുടെ കണ്ടെത്തലുകൾ പുറത്തുവരുന്നതുവരെ ഇവ ആരോപണങ്ങളായി മാത്രമാണ് കണക്കാക്കപ്പെടുന്നത്.