ലോകം: പശ്ചിമേഷ്യയിൽ വീണ്ടും യുദ്ധഭീതി ഉയർത്തി അമേരിക്കയുടെ നിർണായക സൈനിക നീക്കം. ഇറാനെതിരെയുള്ള പുതിയ ആക്രമണ പദ്ധതികളെക്കുറിച്ച് യു.എസ്. പ്രസിഡന്റ് ഡൊണാൾഡ് ട്രംപിന് സൈനിക തലവന്മാർ വിശദീകരണം നൽകിയതിന് പിന്നാലെ 6,500 ടൺ യുദ്ധസാമഗ്രികൾ അമേരിക്ക ഇസ്രായേലിലേക്ക് അയച്ചു. ഇത് മേഖലയിൽ വലിയ സംഘർഷത്തിലേക്ക് നയിക്കുമെന്നാണ് പ്രതിരോധ വിദഗ്ധരുടെ വിലയിരുത്തൽ.
വ്യാഴാഴ്ച നടന്ന സുപ്രധാന കൂടിക്കാഴ്ചയിൽ സെൻട്രൽ കമാൻഡ് കമാൻഡർ ബ്രാഡ് കൂപ്പറും ജോയിൻ്റ് ചീഫ് ചെയർപേഴ്സണും ചേർന്ന് ഏകദേശം 45 മിനിറ്റോളം പ്രസിഡന്റ് ഡൊണാൾഡ് ട്രംപിന് സൈനിക നടപടികളെക്കുറിച്ച് വിശദീകരണം നൽകിയതായി ആക്സിയോസ് റിപ്പോർട്ട് ചെയ്തു. നിലവിലെ സ്തംഭനാവസ്ഥ അവസാനിപ്പിക്കാനും ഇറാനെതിരെ ശക്തമായ നടപടികൾ സ്വീകരിക്കാനും ട്രംപ് ഒരുങ്ങുന്നു എന്നതിന്റെ വ്യക്തമായ സൂചനയാണിത്. ഈ നിർണായക തീരുമാനത്തിന് പിന്നാലെ വെറും 24 മണിക്കൂറിനുള്ളിലാണ് അമേരിക്ക വൻ ആയുധശേഖരം ഇസ്രായേലിലേക്ക് അയച്ചതെന്ന് ജെറുസലേം പോസ്റ്റും റിപ്പോർട്ട് ചെയ്തു.
ഇസ്രായേൽ പ്രതിരോധ മന്ത്രാലയത്തിന്റെ കണക്കുകൾ പ്രകാരം, രണ്ട് വമ്പൻ ചരക്ക് കപ്പലുകളിലും നിരവധി സൈനിക വിമാനങ്ങളിലുമായാണ് ഈ കൂറ്റൻ ആയുധശേഖരം ഇസ്രായേലിൽ എത്തിയത്. ഇസ്രായേലിലെ പ്രധാന തുറമുഖങ്ങളായ അഷ്ദോദിലെയും ഹൈഫയിലെയും തുറമുഖങ്ങളിലാണ് ഈ കപ്പലുകൾ നങ്കൂരമിട്ടത്. ആയിരക്കണക്കിന് വ്യോമ-കര യുദ്ധസാമഗ്രികളും മിസൈലുകളും അത്യാധുനിക സൈനിക ട്രക്കുകളും യുദ്ധമുഖത്ത് ഉപയോഗിക്കുന്ന ജോയിൻ്റ് ലൈറ്റ് ടാക്റ്റിക്കൽ വെഹിക്കിൾസും (JLTV) ഇസ്രായേലിൽ എത്തിയവയിൽ പ്രധാനമാണ്. ഇറാനെതിരായ ആക്രമണ പദ്ധതികൾക്ക് അമേരിക്കൻ ഭരണകൂടം പച്ചക്കൊടി കാട്ടിയെന്ന സൂചനകളാണ് ഈ പുതിയ സൈനിക നീക്കം നൽകുന്നത്. ഇസ്രായേലിനുള്ള അമേരിക്കയുടെ ഈ വൻ സൈനിക പിന്തുണ പശ്ചിമേഷ്യയിലെ ഇപ്പോഴത്തെ സമാധാന ശ്രമങ്ങളെ ബാധിക്കാനും വീണ്ടും യുദ്ധസമാനമായ സാഹചര്യങ്ങളിലേക്ക് തള്ളിവിടാനും സാധ്യതയുണ്ട്.
