ഇന്ത്യ: ആഗോള വിപണിയിലെ സമ്മിശ്ര സൂചനകളുടെ പശ്ചാത്തലത്തിൽ ബുധനാഴ്ച ഇന്ത്യൻ ഓഹരി വിപണി ഫ്ലാറ്റ് നോട്ടിൽ വ്യാപാരം ആരംഭിക്കുമെന്നാണ് സൂചന. ഗിഫ്റ്റ് നിഫ്റ്റി നേരീയ തോതിൽ ഉയർന്ന് നിൽക്കുന്നത് വിപണിക്ക് നേരിയ ആത്മവിശ്വാസം നൽകുന്നുണ്ട്. ചൊവ്വാഴ്ച തുടർച്ചയായ മൂന്നാം സെഷനിലും നേട്ടം നിലനിർത്താൻ സാധിച്ച ഇന്ത്യൻ ഓഹരി വിപണിയിൽ സെൻസെക്സ് 544.15 പോയിന്റ് ഉയർന്ന് 76,808.48 ലും, നിഫ്റ്റി 50 സൂചിക 135.25 പോയിന്റ് നേട്ടത്തിൽ 23,989.15 ലുമാണ് വ്യാപാരം അവസാനിപ്പിച്ചത്.
വാൾസ്ട്രീറ്റിലെ സാങ്കേതിക ഓഹരികളിലുണ്ടായ വിൽപ്പന സമ്മർദ്ദം ഏഷ്യൻ വിപണികളെയും ബാധിച്ചിട്ടുണ്ട്. ജപ്പാനിലെ നിക്കി ഉൾപ്പെടെയുള്ള പ്രധാന സൂചികകൾ ഇടിവ് രേഖപ്പെടുത്തി. യുഎസ് വിപണിയിൽ നാസ്ഡാക്ക് 1.15 ശതമാനവും എസ് ആൻഡ് പി 0.57 ശതമാനവും ഇടിഞ്ഞപ്പോൾ ഡൗ ജോൺസ് നേട്ടം നിലനിർത്തി. എൻവിഡിയ, എഎംഡി, ഇന്റൽ തുടങ്ങിയ പ്രമുഖ ടെക് ഓഹരികളിൽ വലിയ ഇടിവാണ് പ്രകടമായത്. അതേസമയം, ഗിഫ്റ്റ് നിഫ്റ്റി 24,032 ലെവലിൽ വ്യാപാരം തുടരുന്നത് സൂചികകളിൽ പോസിറ്റീവായ തുടക്കത്തിന് സാധ്യതയൊരുക്കുന്നു.
അന്താരാഷ്ട്ര വിപണിയിൽ സ്വർണ്ണ വിലയിലും ക്രൂഡ് ഓയിൽ നിരക്കിലും നേരിയ വർദ്ധനവുണ്ട്. പണപ്പെരുപ്പ ആശങ്കകൾ കുറഞ്ഞ സാഹചര്യത്തിൽ സ്പോട്ട് സ്വർണ്ണ വില ഔൺസിന് 4,348.93 ഡോളറിലെത്തി. ബ്രെന്റ് ക്രൂഡ് ഓയിൽ ഫ്യൂച്ചറുകൾ 79.35 ഡോളറിലേക്ക് ഉയർന്നു. ഡോളർ സൂചികയിൽ നേരിയ ഇടിവ് പ്രകടമാണ്. അതേസമയം, കഴിഞ്ഞ ദിവസം വിദേശ സ്ഥാപന നിക്ഷേപകർ (എഫ്ഐഐ) 749.18 കോടി രൂപയുടെ ഓഹരികൾ വിറ്റഴിച്ചപ്പോൾ, ആഭ്യന്തര നിക്ഷേപകർ (ഡിഐഐ) 0.06 കോടി രൂപയുടെ ഓഹരികൾ വാങ്ങി വിപണിയിലെ സാന്നിധ്യം നിലനിർത്തി.
